Sum liður í bygnaðarbroytingum, søkir Arbeiðs- og brunaeftirlitð eftir einum fakliga sterkum og royndum deildarleiðara til nýggja fyrisitingarliga fakdeild.

Á deildini starvast tríggir løgfrøðingar, umframt deildarleiðarin. Tilgongdin við bygnaðarbroyting kann tó hava við sær, at fleiri starvsfólk og uppgávur leggjast til deildina.


Um deildina
Uppgávurnar á deildini fevna millum annað um:

• At fyrireika og taka avgerð í arbeiðsskaðatryggingarmálum
• At ráðgeva leiðslu og starvsfólkum í løgfrøðiligum og fyrisitingarligum ivamálum og tulkingarspurningum
• At veita nevndum og ráðum, sum stovnurin varðar av, fyrisitingarligar tænastur
• At stuðla øðrum fakdeildum í málsavgreiðslu og gera innanhýsis vegleiðingar til málsviðgerðina á stovninum
• At hava ábyrgdina av reglufyrireikandi arbeiðnum á stovninum, í samstarvi við aðrar fakdeildir
• At svara klagum og  avgreiða fyrisitingarlig sektaruppskot
• At umsita dátaverndaruppgávur  
• At luttaka í innanhýsis verkætlanum
• At umboða stovnin í viðkomandi millumtjóða samstarvi

Um teg
Vit leggja dent á, at tú, sum deildarleiðari og løgfrøðingur, kann arbeiða skjótt og sjálvstøðugt, er nærløgd/-ur og hevur eitt jaligt sinnalag. Harumframt verður dentur lagdur á, at tú ert væl fyri fakliga, og hevur ágrýtni til at seta teg inn í nýggja lóggávu og arbeiðsgongdir.

Leiðsluhugur og hegni hevur týdning, eins og eitt gott eyga fyri trivnaðinum og menningini hjá starvsfólkunum.

Rætti umsøkjarin dugir væl at orða seg í skrift og talu og stendur seg væl undir trýsti.


Førleikakrøv
Tann, sum verður sett/-ur, skal hava prógv sum løgfrøðingur á kandidatstigi (cand.jur ella líknandi). Ynskiligt er harumframt, at tann sum verður sett/-ur, hevur munandi løgfrøðiligar og fyrisitingarligar royndir frá øðrum almennum stovni ella aðalráði og royndir við lóggávuarbeiði.


Lønar- og setanartreyti
Talan er um fast starv, ið verður sett sambært sáttmála millum Fíggjarmálaráðið og Búskapar- og Løgfrøðingarfelag Føroya. Starvið verður sett skjótast gjørligt.


Umsókn
Umsóknir til starvið við avriti av prógvum og viðmælum skulu sendast til Arbeiðs- og brunaeftirlitið, undir Bryggjubakka 27, FO-110 Tórshavn, ella til umsokn@arb.fo

Umsóknarfreistin er fríggjadagin 22. august 2025. Setanarsamrøður verða væntandi í viku 35.

Meira kunning um starvið fæst við at venda sær til Leiv Persson, stjóra, á telefon 23 64 40 ella við telduposti á lp@arb.fo
 

Arbeiðs- og brunaeftirlitið er eftirlits- og vitanarstovnur undir Umhvørvismálaráðnum og Løgmálaráðnum. Stovnurin er føroyski myndugleikin fyri arbeiðsumhvørvi, samskipan av tilbúgving, brunatrygd, mát og vekt, spreingievni, vinnukaving og fýrverk.

Høvuðsuppgávurnar hjá Arbeiðs- og brunaeftirlitinum eru støðugt at betra trygdina og vitanarstøðið á økjunum, sum stovnurin umsitur. Hesum málum røkkur stovnurin við dygdargóðari umsiting, fakligari leiðbeining, málrættaðum eftirlitum og gransking av óynsktum hendingum.